首頁 > 我的資訊 > >
2014 年 03 月 19 日

奧林比亞曼勿錯過

祖爾甘保(奧林比亞高斯)


哀兵曼聯再上征途,睇怕都好難喺歐聯16強次回合過到奧林比亞高斯呢關,因為奧脫福主場威力全無,加上莫耶斯眾叛親離,捧奧林比亞高斯開「讓客」晉級,送紅魔鬼同莫耶斯一程。(周三16,有線61、64及201台周四3:45am直播)


周日英超喺主場慘負死敵利物浦0:3後,曼聯已經輸到底褲都除埋,因為佢哋喺英超時代從未試過單季累積5次兵敗奧脫福,可想而知主場威力已經蕩然無存,更令人唏噓嘅係,球隊成績插水,全世界都踩多莫耶斯一腳,最新消息話傑斯同佢喺更衣室開火,英國傳媒就爆料話莫耶斯最快聽晚被炒魷,連唔關事嘅愛華頓U18教練都走出嚟抽水,話莫耶斯當年唔著重青訓,一沉百踩咪就係咁解囉,社會係咁現實架喇!
查維亞靴南迪斯同莊尼伊雲斯因傷繼續缺陣,傳聞基斯史摩寧亦有輕傷,不過最令曼聯球迷感到憂慮嘅係,一對箭頭朗尼同尹佩斯演出時好時壞,個人演出就算冇問題,但合拍度方面就明顯不足,而且桑馬達今仗不合資格上陣,另一今季加盟嘅新援費蘭尼又被指表現唔合符曼聯球員水準,首回合落後0:2嘅紅魔鬼神仙難救。


奧林比亞防守可信賴


希臘傳統勁旅奧林比亞高斯首回合贏波後,番回本土聯賽罕有地兩連敗,分別不敵彭尼杜列高斯同埋PAOK,不過上周又輕取彭治亞基高斯,球員顯然已經調節好身心狀態,何況即使連輸兩場,奧林比亞高斯依然喺希臘聯賽高踞榜首,平均一場比賽失唔到1球,來自西班牙嘅門將羅拔圖占美利斯應記首功,有佢把守最後一關可以信賴。
除咗守得,奧林比亞高斯亦好攻得,阿仙奴借將祖爾甘保同埋沙馬列斯等進攻球員首回合已證明身價,是役作客奧脫福有望再成曼聯心腹大患,奧林比亞高斯「讓客」有2.65倍唔買唔得啦!             (森林木)

文章來源:新報