首頁 > 我的資訊 > >
2014 年 03 月 23 日

車仔賀雲格6蛋贈興

■舒賀爾尼(左)第二球喺哥斯尼兩腳中間射入,施捷斯尼睇唔到都冇得好講。


真係抵摩連奴牙擦,因為雲格的確係失敗者嘛!英超周六頭場大戰,領軍第1,000場嘅雲格賽前歡天喜地,但摩帥早前串雲格8年無冠係失敗者,果然今場冇面俾,最終打少個嘅阿仙奴大敗0:6,雲格呢個千場紀念都認真係畢生難忘。


阿仙奴今季表面上發揮穩定,但由於領隊雲格食古不化,前鋒又唔買多個,對弱隊佢哋係攞到好多3分,但翻查今季佢哋對強隊成績,聯賽作客前3球隊利物浦、曼城,分別大敗1:5及3:6,到歐聯作客不敵拿玻里、多蒙特,可見阿仙奴對強隊完全冇對抗能力。


球證趕錯傑比斯出場


可憐天真嘅雲格喺自己第1,000場領軍賽事,都未明白問題所在,竟然大膽起用雙箭頭基奧特拍普多斯基,中場又再次放棄攔截力強嘅法米尼用上打強隊例出事嘅阿迪達,果然成個故事又好似同輸俾利物浦一次翻版嘅一樣,開波只係5分鐘,伊度奧一次快速反擊就先開紀錄,兩分鐘後舒賀爾尼喺相同位置再下一城,17分鐘係成場波關鍵所在,當時夏薩特禁區起腳,阿歷士張伯倫龍門上身飛身用手救出,球證聽完旁證講判咗12碼,但就趕錯咗基蘭傑比斯出場,完半場前奧斯卡近門撞射再拉開比數,車路士半場贏到4球兼開出150倍半場波膽。
換邊後雲格知輸梗都先後換走張伯倫同哥斯尼,而奧斯卡都唔客氣喺66分鐘憑勁射再得手,而新加盟嘅穆罕默德沙拉,後備入替亦攻入加盟後第一個入波,最終車路士開埋「主其他」贏6:0。至於阿仙奴作客榜首3強輸晒,3場波共失17球,都可以叠埋心水爭足總盃啦!

■球證馬連拿(灰色衫)錯誤向傑比斯出示紅牌,連傑比斯都一臉茫然。

文章來源:新報