首頁 > 我的資訊 > >
2014 年 04 月 02 日

車仔讓客早「爾」定局

伊巴謙莫域(巴黎聖日耳門)


車路士今季嘅特點係遇強越強,遇弱越弱,所以佢哋今晚出訪法國,面對新貴巴黎聖日耳門挑戰未必會輸實,更何況主隊喺歐洲賽打英超兵嘅往績慘不忍睹,車仔「讓客」唔輸都收錢勁抵買!(周三21,有線61及64台周四2:45am直播)


巴黎聖日耳門喺法甲一枝獨秀,近9場更加贏晒,不過對上一次失分就係面對實力有番咁上下嘅摩納哥,某程度上反映聖日耳門只識得欺善怕惡,而且法甲整體水準始終有別於英超、西甲同德甲,單憑國內戰績作比較冇乜意思。


巴黎強攻得不償失


阿歷士洛里高話做好倒戈準備,佢強調冇唔妥車路士,當年只係波亞斯將佢賣走,所以同舊隊友以致摩連奴都冇心病,至於佢依家嘅教練白蘭斯就話,今晚歐聯8強首回合會排出卡雲尼、伊巴謙莫域同拿維斯嘅三箭頭組合,不過白蘭斯好似計漏咗,車路士並唔怕對手狂攻,只怕對方死守,巴黎聖日耳門主動或招致失利。


近七戰英球隊一勝


另一個值得睇好車路士嘅因素,係巴黎聖日耳門面對英超兵唔識贏,佢哋喺歐洲賽7戰英格蘭球隊僅獲1勝,格食格味道相當濃,雖然藍戰士今晚會缺少咗唔合上陣資格嘅尼曼查馬迪,不過拉美利斯喺16強停賽完畢後,是役可重披戰衣,而艾殊利高爾受傷亦冇影響,事關佢已經冇咗正選好耐,另外伊度奧倦勤,無論改派費蘭度托利斯又好,用丹巴巴亞都好,其實都冇所謂,反正車仔單箭頭呢個位置都係旨在湊夠11個人,入球重任始終係夏薩特、奧斯卡杜斯山度士,甚至係老將林柏特一班中場球員身上。
總之一句講晒,車路士歐洲賽經驗豐富過巴黎聖日耳門好多,而且採取被動踢法玩突擊開正摩連奴嗰家波,加上數據挺英超球會,今晚藍戰士受讓一球,呢個1.83倍「讓客」絕對買得過,買多注1:1波膽亦無妨。(森林木)

施治(車路士)

文章來源:新報