首頁 > 我的資訊 > >
2014 年 04 月 07 日

西甲形勢冇變化

■魯爾加西亞(右二)一箭定江山,幫馬體會保住榜首地位。

西甲形勢冇變化!為咗遷就歐聯賽期,西甲榜首三雄馬體會、巴塞同皇馬都喺星期六晚登場,結果馬體會險勝維拉利爾、巴塞大勝貝迪斯、皇馬作客更狂數皇家蘇斯達,三雄一齊贏波令西甲聯賽形勢不變,未來6周肯定出現更多變化。


賽前以一分優勢排喺榜首嘅馬體會,喺星期六晚首先登場,球隊主場面對「黃色潛艇」維拉利爾,最終雖僅憑魯爾加西亞14分鐘入波贏1:0,但已足夠攞足3分賽後肯定續留榜首;事實上,馬體會今屆可以同巴塞皇馬鬥到叮噹馬頭,的確令唔少球迷覺得意外,只係球隊下季可唔可以保持成績就好難講,事關法甲新豪門摩納哥,據講已準備出手搶奪馬體首席射手迪亞高哥斯達,仲出動4,000萬鎊(約5.14億港元)轉會費同除稅後15萬鎊(約192萬港元)周薪作利誘,明顯有心喺車仔身上搶走呢位西班牙國腳。


巴塞球迷抗議國際足協


馬體會出場之後,就輪到巴塞隆拿表演,結果球隊有美斯喺14同86分鐘入波,加上對手佐迪費古拉斯擺烏龍,最終以3:1大勝而回;老實講,今場波其實冇乜特別,反而巴塞球迷帶晒橫額入場,抗議國際足協處罰巴塞未來14個月唔准買賣球員,卻成為咗傳媒焦點,唔知國際足協官員見到之後有乜諗法呢?


皇馬冇C朗照四球炒皇蘇


講番西甲,馬體會同巴塞贏波,賽前排第3嘅皇馬就壓力更大,球隊對住皇蘇仲有C朗因傷未趕及復出,確令一眾球迷非常擔心;好彩嘅係,皇馬眾球員都及時挺身而出,最終由伊拿拉文迪、加里夫巴利、比比同艾華路莫拉達各入一粒贏4:0;攞晒3分之後,皇馬以32戰76分留守第3,分以兩分同3分落後巴塞同馬體會。
另外要注意嘅,係皇馬日前宣布會喺夏天出征美國同亞洲,其中8月2號會喺美國鬥曼聯,暫時未知C朗會唔會隨軍出戰舊會。

文章來源:新報