首頁 > 我的資訊 > >
2014 年 06 月 08 日

列奧斯冇得去巴西

■消息指馬高列奧斯(右二)傷勢唔輕,有機會錯過今屆世界盃決賽周。


德國熱身賽大勝阿美尼亞6:1開出8.5倍「主其他」,但係過程有喜亦有悲,值得開心嘅係高路斯破塵封入球紀錄,坐正做國家隊歷史首席射手,可惜同場有馬高列奧斯受傷,並懷疑係脛腓韌帶撕裂,今屆世界盃又多一位球星要缺席。


雖然係開「主其他」,但其實兩隊半場悶和0:0,皆因湯馬士梅拿同埋馬高列奧斯超級敗家,三番四次錯失黃金機會,直至後者受傷退下火線,德國嘅進攻先至有起色,問題係馬高列奧斯傷勢絕對唔輕,被換出後已立即送去醫院檢查,有消息指佢可能係脛腓韌帶撕裂,最終勒夫都宣布佢無緣決賽周,並由森多利亞嘅梅斯達菲作替補。
第一個入球要等到下半場52分鐘先出現,但呢球波亦係德國大屠殺阿美尼亞嘅序幕,舒賀爾尼接應普多斯基傳中後腳射入,全場掌聲雷動,事關呢位車路士球星係喺緬恩斯出道,今場友賽喺正緬恩斯主場上演,舒賀爾尼梗係要多謝鄉親父老支持啦!


高路斯破梅拿紀錄


後備上陣嘅哥斯基奧斯喺70分鐘犯天條輸12碼,造就自己嘅多蒙特隊友米希達利恩主射極刑建功,幫阿美尼亞追成1:1,此時如夢初醒嘅德國先至積極反撲,憑住普多斯基、賀維迪斯,同埋高路斯各建一功,加上馬里奧葛斯梅開二度,埋單以6:1大勝阿美尼亞,為決賽周壯行色。
普多斯基6月4號生日,高路斯就係6月9號生日,兩人今仗都有入波,無論係補祝定預祝一樣咁開心,但高路斯呢份生日禮物點計都大啲,因為連埋對阿美尼亞嘅入波,佢喺國家隊已累積入咗69球,打破咗第一代轟炸機梅拿塵封已久嘅紀錄,正式成為德國歷史第一號神射手,只係教練勒夫都笑唔出,因為佢冇咗馬高列奧斯囉!

■舒賀爾尼(右)呢個入波最多掌聲,皆因佢返母會緬恩斯球場比賽吖嘛。

文章來源:新報