首頁 > 我的資訊 > >
2014 年 06 月 18 日

拿傑迪錫正式過巴塞

■拿傑迪錫正式加盟巴塞,如果克羅地亞打後遇到西班牙就可以同未來隊友打聲招呼。


就算今晚克羅地亞有咩意外,肯定有個球星可以笑住踢,事關西甲豪門巴塞隆拿喺克羅地亞硬撼喀麥隆場波之前,宣布簽得拿傑迪錫,雖然仲有好多細節都未有公布,但係呢位球星能夠由西維爾「升呢」轉投巴塞都幾難笑唔出口。
季尾幫西維爾贏得歐霸盃冠軍嘅拿傑迪錫幾時會走都只會係時間問題,係諗唔到一走就走去巴塞,而且份合約仲要係去到2019年咁長!好在呢單轉會遲咗成個禮拜先至搞掂,如果早喺揭幕戰前席就公布嘅話,拿傑迪錫見到未來隊友尼馬真係唔知應該阻佢好,定係唔阻佢好?諗番起克羅地亞陣中兩個攻中,依家一個加盟巴塞而另一個莫迪歷就效力緊皇馬,以後嘅「西班牙國家打吡」除咗係巴塞隆拿鬥皇家馬德里之餘,仲係拿傑迪錫鬥莫迪歷嘅個人賽事。

文章來源:新報