首頁 > 我的資訊 > >
2014 年 07 月 01 日

墨球迷求婚撞正史奈達入波

■墨西哥出局後,一對情侶球迷相擁安慰,可能佢哋就係求婚事件嘅主角。


NBA同埋演唱會求婚都聽得多,估唔到荷蘭對墨西哥嘅世界盃16強戰,都有球迷趁機向女友求婚。不過男方喺時間方面完全捕捉錯晒,一開口唔係夾著脷,而係撞正荷蘭入波,須知道呢對情侶係嚟自墨西哥,唔知最後有冇求婚失敗呢?

據了解,呢位墨西哥球迷一早精心部署要喺比賽當中求婚,佢一早已經袋定介指喺身,可能諗住墨西哥領先1:0,加上仲有兩分鐘就完場,所以決定趁氣氛最好嘅一刻,向身邊嘅女伴求婚,承諾一生一世無論生老病死都照顧對方咁啦!
好可惜史奈達正正喺佢下跪之際怒射破網,個女仔本來好感動咁望住隻介指,但嗰一刻都即刻望返落球場。有目擊者仲話,個女仔塊面黑晒,不過全場大叫嘈到拆天,佢都聽唔到個女仔最後係答應定拒絕,在此祝佢哋好運啦!

文章來源:新報