首頁 > 我的資訊 > >
2014 年 08 月 30 日

捧紐卡素上盤高「水」

真馬特(紐卡素)


紐卡素同水晶宮兩支中下游球隊會喺今晚英超碰頭,後者有新帥禾諾克領軍,軍心起碼定番啲,今場受讓未入過波嘅「喜鵲」半、一自然係捧下盤。(周六24,now625台周六10:00pm直播)

無疑水晶宮頭兩場聯賽輸晒俾阿仙奴同韋斯咸,但唔好忘記嗰場波佢哋係喺冇咗領隊普利斯情況下比賽,依家球隊已經搵到舊帥禾諾克領軍,過去周中英聯盃作客又大勝3:0晉級,對軍心相信肯定有幫助;再講,水晶宮噚日先宣布喺曼聯借到韋費特沙夏,有呢位舊將回巢肯定對球隊攻力大有幫助,讓球盤受讓半、一有冷味。
紐卡素開季到依家其實都係得1分,最重要係兩場聯賽一球都入唔到,而過去周中英聯盃鬥基寧咸,其實亦只煲魚生粥僅贏1:0,證明鋒力真係一般;事實上,紐卡素今季繼續喺法甲搵兵,但利維亞尼、雷米卡比拿等睇落都要時間適應英超節奏,就算荷蘭中場施安迪莊可以復出,但佢冇操一排狀態肯定唔好得去邊,讓到半一咁辣真係唔抵玩。(威威)

文章來源:新報