首頁 > 我的資訊 > >
2014 年 11 月 30 日

周秀娜做內衣生招牌

•(左起)羅仲謙麻利亞周秀娜與張致恆齊齊落場鬥四驅車。


周秀娜(娜姐)噚日聯同羅仲謙(謙仔)同張致恆(Steven)出席潮牌服飾活動,3位着上招牌嘅「迷彩」圖案幫手做吓Model。活動現場仲有個「四驅車賽場」,3個大細路唔止拎住玩具車擺甫士,Steven直頭話自己係四驅車迷。Steven就話:「我拎住嘅呢部粉紅色都要1,900蚊,真係好貴,仲要係入門版。我細個已經好鍾意砌呢啲四驅車仔,大個先發覺真係會使好多錢落去。」


早排就大爆話要搞內衣生意嘅娜姐,透露今次係同另外兩個朋友夾份投資成8位數。記者打趣問係咪想搞到上市?娜姐笑言做生意當然要有咁大搞咁大:「最緊要係多得大家支持啦,(自己做生招牌?)係吖,一定要啦,我要自己試過覺得好先可以介紹畀人!(幾時開舖先?)依家啲租咁貴,都係做住網上先,自己都鍾意喺網度買嘢,應該年底就會有得賣。」
娜姐仲話今次為咗做生招牌,影相都影咗幾千張:「我估今次一次過着咗我一年要着嘅內衣數目!」問到會唔會推出「情趣內衣」?娜姐笑言唔會:「女仔最緊要着得舒服啫。」


謙仔否認同楊怡結婚

另外,謙仔表示稍後要返內地三四個月,拍攝經理人公司投資嘅《三打白骨精》,仲話會同鞏俐有對手戲。提到有報道指謙仔被無綫力捧,有份演嘅新劇《醋娘子》更將吳卓羲(阿Ron)淪為配角。謙仔即解釋話阿Ron先係主角:「佢戲份好多好重。(搞到佢想離巢?)呢樣唔知喎,同佢合作時大家都好開心,佢無講過係咪走喎。」提到有傳謙仔有意同楊怡結婚,佢就猛咁否認:「依家都係做嘢先啦。」
占士報道

文章來源:新報